Православный календарь на каждый день

Преставление прп. Варлаама Хутынского. Тропарь, глас 3.
И́же на земли́ лега́нием,/ поще́нием же и бде́нием/ те́ло твое́ изнуря́я, преподо́бне,/ вся плотска́я мудрова́ния умертви́л еси́;/ и исцеле́ний струя́ незави́стная яви́лся еси́/ ве́рою притека́ющим к тебе́, Варлаа́ме о́тче наш,/ моли́ Христа́ Бо́га/ спасти́ся душа́м на́шим.

Ин тропарь, глас 8.
Богодухо́вныя благода́ти испо́лнився/ и разже́гся любо́вию Животворя́щия Тро́ицы,/ млад яви́ся Бо́гу угожда́яй,/ ревну́я святы́м отце́м преподо́бным,/ вели́кия труды́ возлюби́в,/ и поне́сл еси́, и де́монския посрами́в, мно́жества низложи́л еси́,/ и преста́вися в ве́чный поко́й,/ и ны́не подае́ши прося́щим неоску́дное исцеле́ние,/ исцеля́я многоразли́чныя неду́ги,/ мо́лимтися, святы́й преподо́бне о́тче Варла́аме,/ непреста́нно моли́ся ко Го́споду о ду́шах на́ших.

Кондак, глас 8.
Я́коже други́й Илия́, о́тче, дождь с небесе́ свел еси́,/ он у́бо огнь сведе́ и царя́ удиви́,/ ты же лю́ди твоя́ возвесели́л еси́/ и торжествова́ти устро́ил еси́./ Вели́кий бо Новгра́д вельми́ тобо́ю хва́лится,/ име́я мо́щи твоя́ в себе́,/ его́же сохраня́й от враг непоколеби́ма, да зове́м ти:/ ра́дуйся, преподо́бне Варлаа́ме, о́тче наш.

Свт. Павла, патриарха Константинопольского, исп. Тропарь, глас 3.
Боже́ственныя ве́ры испове́данием/ друга́го Па́вла тя Це́рковь, ревни́теля во свяще́нницех, показа́,/ свозопи́ет ти и Áвель ко Го́споду,/ и Заха́риина кровь пра́ведная./ Óтче преподо́бне, Христа́ Бо́га моли́/ дарова́тися нам ве́лией ми́лости.

Кондак, глас 2.
Облиста́вый на земли́, я́ко звезда́ Небосве́тлая,/ Кафоли́ческую просвеща́еши Це́рковь ны́не,/ о не́йже и страда́льчествовал еси́,/ ду́шу твою́, Па́вле, предложи́в,/ и, я́коже Заха́риина и Áвелева,/ я́сно вопие́т твоя́ кровь ко Го́споду.

Свт. Германа, архиеп. Казанского. Тропарь, глас 4.
От ю́ности и́го Христо́во усе́рдно восприи́м,/ бде́нными по́двиги поста́ и моли́твы просла́вился еси́./ Отону́дуже призыва́ющу тя Бо́гу на служе́ние Це́ркви в новопросвеще́ннем ца́рстве Каза́нстем,/ вку́пе со святи́телем Гу́рием воззва́н был еси́,/ иде́же я́ко первонача́льник созда́нной тобо́ю во гра́де Свия́жске оби́тели и досто́йный первосвяти́телю прее́мник яви́лся еси́./ Ду́хом предстоя́ престо́лу Влады́чню, моли́ся, святи́телю Ге́рмане, со святи́телем Гу́рием/ правосла́вней па́стве во благо́честии преспева́ти, тьме инове́рия све́том ве́ры разгна́тися.

Ин тропарь, глас тойже.
Я́ко вели́ким па́стырем единонра́вна/ и учи́телем вселе́нныя единомы́сленна,/ Це́ркве Бо́жия служи́теля усе́рдна/ и строи́теля Та́ин Христо́вых благогове́йна,/ сте́кшеся, благове́рнии лю́дие,/ Свия́жския оби́тели Богому́драго основа́теля/ и Каза́нския новопросвеще́нныя па́ствы святи́теля Ге́рмана/ пе́сньми и пе́нии восхва́лим, глаго́люще:/ не преста́й присеща́ти моли́твами твои́ми на всю па́ству твою́/и в ве́ре и благоче́стии блюди́ невреди́мо.

Кондак, глас 4.
Бо́дрствуя в моли́твах,/ послуша́ния до́брый рачи́тель быв,/ в терпе́нии стяжа́л еси́ ду́шу твою́,/ де́лы смиренному́дрия и кро́тости изря́дствуя,/ престо́л святи́тельства благове́рием и благоче́стием украси́л еси́,/ о́тче священнонача́льниче Ге́рмане,/ моли́ Христа́ Бо́га о всем ста́де твое́м,/ я́ко па́ствы твоея́ утвержде́ние/ и су́щим по тебе́ святи́телем све́тлое украше́ние.

Кондак, глас 4.
До́блестями преподо́бия и пра́вды/ вруче́нное тебе́ слове́сное ста́до озаря́я/ и на зла́чных Сло́ва Христо́ва па́житях пита́я,/ на пра́вый путь за́поведей Госпо́дних/ си́лою ду́ха твоего́ наставля́л еси́ е./ Те́мже и ны́не, осеня́емое цельбоно́сными чудотворе́нии твои́ми,/ в святу́ю па́мять твою́, зове́м тебе́:/ не преста́й, святи́телю, предста́тельствовати/ пред Пастыренача́льником о ста́де твое́м,/ я́ко па́ствы твоея́ утвержде́ние/ и су́щим по тебе́ святи́телем удобре́ние.

Прп. Варлаама Керетского. Тропарь, глас 1.
Боже́ственною свы́ше просвети́вся благода́тию, преподо́бне,/ мир оста́вил еси́,/ жите́йскую печа́ль и всяк мяте́ж ми́ра сего́/ любве́ ра́ди Христо́вы со дерзнове́нием отве́ргл еси́,/ ева́нгельски Христу́ после́довал еси́,/ и, Того́ яре́м взем, во всем во́ли Его́ повину́лся еси́,/ и весь ра́зум и се́рдце к Нему́ неукло́нно возложи́л еси́,/ Христа́ ра́ди те́ло свое́ изнуря́я посто́м и бде́нием, в моли́твах свои́х не усыпа́я,/ Бо́га ми́лостива творя́ и Пречи́стую Богоро́дицу Моле́бницу предлага́я,/ и сего́ ра́ди от Бо́га восприе́м власть и си́лу на сопроти́внаго врага́,/ не убоя́ся возду́шныя и морски́я тя́готы и сту́дени, ниже́ уклони́ся,/ и морско́ю пучи́ною в ма́ле лади́ице по вода́м ше́ствие творя́,/ про́тив зе́льнаго обурева́ния пла́ваше,/ промышле́нием Боже́ственнаго ра́зума направля́емь,/ и о́коло Свята́го Но́са непроходи́мый путь морски́й/ от ядови́таго че́рвия/ благопрохо́ден челове́ком без вреда́ сотвори́л еси́ моли́твами свои́ми,/ и мно́гим терпе́нием во вре́менней жи́зни по́двиг соверши́л еси́,/ и, равноа́нгельное житие́ пожи́в,/ те́мже и по преставле́нии источа́еши чуде́с благода́ть/ и́же ве́рою приходя́щим к тебе́/ Варлаа́ме, преблаже́нне о́тче наш,/ вопие́м ти: моли́ Христа́ Бо́га,/ да спасе́т ду́ши на́ша.

Кондак, глас 2.
Все у́мное свое́ жела́ние к Бо́гу впери́в,/ и Тому́ невозвра́тно от души́ после́довал еси́,/ и, жите́йския молвы́ отри́нув,/ в моли́твах, и слеза́х, и злострада́ниих плоть свою́ изнуря́я,/ до́бре подвиза́вся проти́ву неви́димаго врага́ ко́знем,/ и, победи́в я, веселя́ся, преше́л еси́ к Небе́сным черто́гом,/ и ны́не со Áнгелы Святе́й Тро́ице предстоя́,/ отню́ду же и Всеви́дящее о́ко, твоя́ труды́ ви́дев,/ да́ром чуде́с по преставле́нии обогати́ло тя есть,/ и́же тебе́ с ве́рою почита́ющим,/ исцеле́ние подава́еши неви́димо/ и мо́лишися непреста́нно, сохраня́я оте́чество свое́ и лю́ди/ от враг ви́димых и неви́димых ненаве́тны,/ да вси тебе́ вопие́м:/ преподо́бне о́тче наш Варлаа́ме, моли́ непреста́нно о всех нас.