Календарь церковных праздников и постов, словарь имён, жития святых на сайте «Ритуальные услуги» г. Пермь. Список тропарей; молитвы и евангельские чтения на каждый день.
Воскресенье 02 октября 2022 / 19 сентября 2022
Неделя 16-я по Пятидесятнице. Глас седьмый.
Неделя по Воздвижении. 
Мчч. Трофима, Савватия и Доримедонта (276).
Блгвв. князей Феодора Смоленского (1299) и чад его Давида (1321) и Константина, Ярославских чудотворцев.
Сщмч. Константина Голубева пресвитера (1918).Сщмч. Николая пресвитера (1919).Прп. Алексия (Соловьева), старца Зосимовой пустыни (1928).Сщмч. Константина пресвитера (1937).Сщмч. Нила пресвитера, прмц. Марии (1938).Мч. Зосимы пустынника Киликийского (IV).Блгв. вел. кн. Игоря Черниговского и Киевского (1147).Сщмч. Ианнуария еп. и с ним мчч. Прокула, Соссия и Фавста диаконов, Дисидерия чтеца, Евтихия и Акутиона мирян (ок. 305).Св. Сегуаноса (Галл.).Свт. Феодора Тарсийского, архиеп. Кентерберийского (690) (Кельт. и Брит.).Чтения дня
Луки 24:12-35 (на утрене. Евангелие 5-e)
Тропари
Тропарь воскресный, глас 7.
Разруши́л еси́ Кресто́м Твои́м сме́рть,/ отве́рзл еси́ разбо́йнику рай,/ мироно́сицам плач преложи́л еси́,/ и апо́столом пропове́дати повеле́л еси́,/ я́ко воскре́сл еси́, Христе́ Бо́же,/ да́руяй ми́рови/ ве́лию ми́лость.
Богородичен, глас тойже.
Я́ко на́шего воскресе́ния сокро́вище,/ на Тя наде́ющияся, Всепе́тая,/ от ро́ва и глубины́ прегреше́ний возведи́;/ Ты бо пови́нныя греху́ спасла́ еси́,/ ро́ждшая Спасе́ние на́ше;/ Я́же пре́жде рождества́ Де́ва, и в рождестве́ Де́ва,/ и по рождестве́ паки пребыва́еши Де́ва.
Кондак, глас тойже.
Не ктому́ держа́ва сме́ртная/ возмо́жет держа́ти челове́ки:/ Христо́с бо сни́де, сокруша́я и разоря́я си́лы ея́;/ связуе́м быва́ет ад,/ проро́цы согла́сно ра́дуются,/ предста́, глаго́люще, Спас су́щим в ве́ре:/ изыди́те, ве́рнии, в воскре́сение.
Мчч. Трофима, Савватия и Доримедонта. Тропарь, глас 8.
В Тро́ице хвали́мый Бог, тро́ицу му́ченик просла́ви,/ Трофи́ма и Савва́тия и Доримедо́нта:/ в Того́ бо ве́ровавше, врага́ низложи́ша./ Тех моли́твами, Христе́ Бо́же наш, поми́луй нас.
Кондак мучеников, глас 8.
Я́ко страда́льцев основа́ние, и благоче́стия утвержде́ние,/ Це́рковь чтит и сла́вит твое́ светоно́сное страда́ние,/ приснопева́емый блаже́нне страда́льче, доблему́дре сла́вне Трофи́ме,/ со страда́вшими с тобо́ю,/ очище́ние пою́щим тя испроси́, я́ко непобеди́мь.
Блгвв. князей Феодора Смоленского и чад его Давида и Константина. Тропарь, глас 4.
От ю́ности ва́шея Христо́ве любви́ прилепи́вшеся, святи́и,/ усе́рдно зако́н и оправда́ния Того́ сохрани́сте,/ отону́дуже и чуде́сными дарова́ньми обогати́вшеся,/ исцеле́ния источа́ете,/ Фео́доре, Дави́де и Константи́не,/ о ве́рою вас почита́ющих,/ моли́те Христа́ Бо́га,/ спасти́ся душа́м на́шим.
Ин тропарь, на преставление Феодора, подобен, глас 4.
Я́ко цели́тель преизря́ден и каза́тель благоприя́тен/ мирски́й мяте́ж оста́вил еси́/ и, крест свой на ра́мо взем/ и боже́ственным житие́м пожи́л еси́ и воздержа́нием пло́ти украси́лся еси́,/ к тебе́ притека́ющим сосу́д избра́нный показа́вся, всеблаже́нне Фео́доре,/ воспева́ющих твою́ па́мять в псалме́х и пе́снех, преподо́бне,/ моли́ся о душа́х на́ших.
Ин тропарь, глас 4.
Измла́да яви́лся еси́, богому́дре кня́же,/ боже́ствен сосу́д невозбра́нен Бо́гови,/ ны́не то́чиши нам многоцеле́ния,/ вся е́реси потопля́я и спаса́я при́сно свой град/ и всех ве́рных сохраня́я, и неви́димо от ви́димых враг,/ ве́рою тя мо́лим, преподо́бне о́тче наш, кня́же Фео́доре,/ моли́ спасти́ся душа́м на́шим.
На перенесение мощей святаго, тропарь, глас 8.
Я́ко зве́зды многосве́тлыя от ю́ности возсия́вше,/ освети́ли есте́ сердца́ ве́рных пренесе́нием честны́х моще́й ва́ших,/ во пло́ти, я́ко Áнгелы на земли́ показа́стеся,/ поще́нием насажде́ни бы́сте я́ко древа́, при вода́х воздержа́ния,/ напое́ни струя́ми слез ва́ших, и скве́рну омы́сте./ Сего́ ра́ди яви́стеся прия́телища Бо́жия Ду́ха,/ Фео́доре, и Дави́де, и Константи́не,/ моли́те Христа́ Бо́га, спасти́ся душа́м на́шым.
Ин тропарь, глас 4.
Я́ко апо́столом сприча́стницы и вра́чеве предо́брии,/ служи́тели богоприя́тнии,/ па́мяти ва́шей боже́ственней притека́ющим,/ святи́и богому́дрии, достоблаже́ннии, благочести́вии кня́зие,/ новоявле́ннии чудотво́рцы Фео́доре и Дави́де, и Константи́не,/ соше́дшеся любо́вию в па́мять ва́шу, све́тло пра́зднуем/ в пе́снех и пе́ниих, ра́дующеся Христа́ сла́вяще,/ такову́ю благода́ть дарова́вшего вам исцеле́ний,/ гра́ду ва́шему Яросла́влю вели́кое утвержде́ние.
На преставление кондак, глас 4.
Яви́ся ве́лие со́лнце Христо́ве Це́ркви,/ просвеща́я уче́ний светлостьми́, всече́стне,/ я́ко черпа́лом златы́м от Кла́дязя неиско́паннаго чуде́с поче́рпл еси́,/ от Исто́чника неистощи́маго/ на успе́ние свое́ приспе́л еси́,/ всеблаже́нне Фео́доре,/ и ны́не всех мо́лиши, да улучи́м грехо́в проще́ние.
Ин кондак, глас 1.
Многому́дренне пресели́вся, преподо́бне кня́же Фео́доре, в град присноцвету́щ,/ яви́лся еси́ я́ко многосве́тлая звезда́, в ми́ре сия́я,/ в поще́нии испра́вив жизнь свою́,/ и ны́не получи́л еси́ живо́т ве́чный на Небесе́х.
Кондак на перенесение мощей, глас 8.
Яви́стеся свети́льницы всесве́тлии во пло́ти, я́ко Áнгели,/ и, я́ко жи́зни древеса́ ра́йская,/ поще́нием, бде́нием и ве́рою возраща́еми, процвели́ есте́,/ моли́твами ва́шими Небе́сныя благода́ти прие́мше,/ вра́чеве кре́пцы я́вльшеся,/ исцеля́ете неду́гующих ду́ши,/ с ве́рою прибе́гающих к ра́це моще́й ва́ших,/ чудотво́рцы сла́внии, Фео́доре, Дави́де и Константи́не:/ моли́те Христа́ Бо́га, грехо́в оставле́ние дарова́ти/ ве́рою и любо́вию чту́щим па́мять ва́шу.
Ин кондак на перенесение мощей, глас 8.
Я́ко свети́льницы и вра́чеве преизря́днии яви́стеся,/ ве́рныя озаря́юще светлостьми́ чуде́с ва́ших,/ во пло́ти бо на земли́ благоугоди́сте Бо́гу,/ И́же во святы́х Прославля́емому,/ Его́же непреста́нно моли́те о всех нас.
Блгв. вел. кн. Игоря Черниговского. Тропарь, глас 4.
Наста́ днесь всечестна́я па́мять страстоте́рпца,/ благове́рнаго кня́зя И́горя,/ созываю́щая лю́ди в пречестны́й храм Спа́сов,/ иде́же, ра́достно соше́дшася, благочести́вых мно́жество/ моли́твенно пра́зднуют святу́ю па́мять твою́,/ и с ве́рою взыва́ют ти:/ моли́ся, свя́те,/ стране́ Росси́йстей, гра́ду Черни́гову и всем правосла́вным христиа́ном/ в ми́ре и благоде́нствии спасти́ся.
Ин тропарь, глас 4.
Просвети́вся боже́ственным креще́нием,/ Ду́ха Свята́го светлостьми́ озаря́емь,/ Ева́нгелие Христо́во в се́рдце твое́ восприя́л еси́,/ де́лом сло́во Сы́на Бо́жия исполня́я,/ благове́рный кня́же И́горю,/ моли́ Всеблага́го Спаси́теля на́шего/ дарова́ти нам мир, и ми́лость,/ и спасе́ние душ на́ших,/ чту́щих честну́ю па́мять твою́.
Кондак, глас 6.
Измени́л еси́ земна́го княже́ния сла́ву/ во и́ночества о́браз смире́нный/ и, страда́льчески земно́е житие́ сконча́в,/ ны́не на Небесе́х ра́дуешися,/ усе́рдне моля́ся о чту́щих тя,/ И́горю, страда́льцев похвало́.
Ин кондак, глас 8.
Кня́жескую диади́му обагри́л еси́ кро́вию твое́ю,/ богому́дре страстоте́рпче И́горю,/ за скиптр крест в ру́ку прии́м, яви́лся еси́ победоно́сец/ и же́ртву непоро́чну Влады́це прине́сл еси́ себе́./ Я́ко бо Áгнец незло́бив, от раб убие́н был еси,/ и ны́не ра́дуяся предстои́ши Святе́й Тро́ице,/ моли́ спасти́ся душа́м на́шим.
